القهوة \فؤاد حداد

القهوه تحبّ كنكه

والكنكه تحب كنبه

والكنبه تحب قعده

مبسوطة مربّـعه

وكـنّـا أربـعـه

أنا وانتِ وأنا وانتِ

*****

وكنا عيون كتير

وطبلـيّـه وزير

ولا بنحبّ نبكي

ولا بنعرف نطير

أنا وانتِ وأنا وانتِ

*****

سبنا البوسطه ورانا

في الترماي اللي داير

العـتـبـه للإمـام

كان ريقك جنبي ساكت

حـبّـيـتك من زمان

أنا وانتِ وأنا وانتِ

*****

شـمّـيت لادن سعيد

شـمّـيـته من بعيد

شـمّـيـته من قريّب

خمس سنين حاغـيّب

على الشماعه خايـف

وباخاف على الدولاب

وبادوب على البـلاط

وباحسّ الظـله تـقلت

وباسـمع الوابـور

وباحسّ المـيّـه تقلب

أنا وانتِ وأنا وانتِ

*****

الظُهر الشمس تلحس

الظله في الليمـان

والظهر الشمس تعمل

سيبرتايه دهـب

بصينا لبعض فيها

ومشينا لبعض نبكي

وقعدنا من التعب

أنا وانتِ وأنا وانتِ

*****

باقول لك إيه باقول لك

حاجيب حاجات قديمه

قلبي كوره شراب

نلعب والا ما نلعب

فرحت لنا المدينه

وامبارح في التراب

أنا وانتِ وأنا وانتِ

*****

وبنفرش ضينا

على ظلّة بعضنا

واحنا بنبرد هناك

علشان ندفا هنا

والقهوه تقول لنا

على بال النار ما تلسع

بتبقى حنـيّـنه

أنا وانتِ وأنا وانتِ

» الأسطي فؤاد موجود \فؤاد حداد
» أنا المغني\ فؤاد حداد
» في حب مصر فؤاد حداد
» حب الوطن \فؤاد حداد
» البسمةهلت\ فؤاد حداد